Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on শুক্রবার, ২৬ জুন, ২০১৫ | ১১:২৮ PM

মাননীয় প্রধানমন্ত্রী
হাসিনা মাই,

ছিঠির ফয়লা গাউ-গেরামর আাজার আাজার হতভাগা, আউয়া-জাউয়া, অশিক্ষিত ও অবহেলিত জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি আফনে বেশ ভালাউ আছইন।
পর সমাচার মাই গো,
আমরার গাউ-গেরামও মেঘ-তুফান শুরু অইছে। এখন আমরা রাস্তা-ঘাট লইয়া বেশ মছিবতও আছি। মেঘ-তুফানর দিন আমরা রাস্তা-ঘাটর ফেখ-ছেখ ছানতে ছানতে ফাউত ফাখলা অইযায়। কয়েক বছর আগে তেব বাটা অঞ্চলও নৌকা ফাউয়া যাইতো। এখন মানুষে হাওর উন্নয়নর লাগি হখলবায় বান্দ-টান দিয়া আর ফিসারী-ফাসারী খরিয়া নৌকার রাস্তা বন্ধ করায় তাও সম্ভব অয়না।
মাই গো,
প্রত্যেক বছর আমরা মেঘ-বাদলির দিন এই রাস্তা-ঘাটর কষ্টে হেদাত মিটে। তারপরেও তা সমাধানর লাগি কেউ মাতেনা। আমরার লাখাইন আউয়া-জাউয়া মানুষর ভোটে যারা উপজেলা চেয়ারম্যান, ভাইস চেয়ারম্যান, চেয়ারম্যান আর মেম্বার অইছওইন তারা ইবায়দি কোন খেয়াল দেইন্না।
মাই গো,
মেঘ বাদলির দিন আইলে আমরার রাস্তা ঘাটর হালত-বেহালত অইযায়। গাউ-গেরামর কাঁচা রাস্তাত ফেখ-ছেখ অইয়া গাড়ি-ঘোড়া চলাতো দূরর কথা মানুষে আটতে ফারওইন্না। এরফরেও আমরার চেয়ারম্যান ও মেম্বার অখলে সামান্য ইটও ফালাইন্না।
মাই গো,
ইতা খইয়া কোন লাভ নাই। আফনে হুনলে তাজ্জব অইবায় আমরার চেয়ারম্যান আর মেম্বার হখলে যার যার সুবিদা মতো কাম-কাজ করাইন। এলাকার মানুষ কোন জায়গায় কাজ করার আবদার লইয়া ইউনিযন চেয়ারম্যানর কাছে গেলে সুযোগ থাকার পরে খইবা মেম্বারর গেছে যাউ। মেম্বারর গেছে গেলে মেম্বারে খইবা চেয়ারম্যান সাবরে খইয়া ফারলে কাজ করাও।
মাই গো,
ইতা মাতিয়া লাভ নাই। মেম্বার সাবে তান মন মতো জায়গা ছাড়া কাজ করাইন্না। আর চেয়ারম্যান সাবে মনে করওইন মেম্বারের করাউক্কা। তাইন যে বরাদ্ধ ফাইন তা তান এলাকাত বা নিজর সুবিদা মতো জায়গাত করাইবা। আর আমরা এই সাধারন জনগন তানতান ফান্দ হামাইয়া কান্দা ছাড়া আর কোন উফায় নাই।
মাই গো,
আমরার শেষ আকুতি যদি আফনার দয়ার নজর অয় তবে আফনে আমরার এমপি সাবরে বা জেলা পরিষদর প্রশাসক সাবরে একটু খইয়া দিবা। যাতে করি গাউ গেরামর আউয়া-জাউয়া মানুষ কিছুটা অইলেও উপকার ফাইন।
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad