জকিগঞ্জী চাচার খোলা চিঠি

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর আাজার আাজার হতভাগা, আউয়া-জাউয়া অশিক্ষিত জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি আফনে বেশ নিরাপদে আছইন।
পর সমাচার মাই গো,
আমরার বায়দি আফনে তুড়া কিয়াল দেউক্কা। নাইলে আমরার হাল বেহাল অইযিব। নেপালর বুইছালে জকিগঞ্জরে যেভাবে কাঁপাইছে ইলা আর কাঁপাইলে আমরার বাঁচা মরা আল্লাহর আতও।
মাই গো,
জকিগঞ্জর উপজেলার বিল্ডিং ও আদালতের বিল্ডিং থাকি শুরু করিয়া বেশ কয়েকটা অফিস, স্কুল ও মার্কেটর বিল্ডিং সীমা ছাড়া বুইছালর ঝুকিত আছে। বড় একটা বুইছালে ঝাকড়া দিলে ইতা বিল্ডিং ধড়ধড়াইয়া ভাঙ্গিয়া পড়বো। আর ই সময়ে মানুষর অবস্থা কিতা অইবো ইতা আফনে বুঝউক্কা।
মাই গো,
এই সকল প্রায় বিল্ডিং অখল পরিত্যাক্ত করা অইলেও আইজ পর্যন্ত কেউ কিয়াল দের না। ৫/৬ বছর আগে আদালত বিল্ডিংর ছাদর আস্তরর বড় এক চাকা আমরার তখনকুর ম্যাজিষ্ট্রেট সাবর উপরে তুড়ার লাগি পড়িযিত আছিল। আল্লাহ তুড়ার লাগি তানরে রক্ষা করছওইন।
মাই গো,
আমরার সাংবাদিক বেটাইন্তে ইতা বিল্ডিং অখলর কথা লেখতে লেখতে কলম শেষ করলা কিন্তু আইজ পর্যন্ত কাজর কাজ কুচ্ছু অইছে না। মনে অয় আফনারা এখন ইতা পত্রিকা উত্রিকা পড়া বাদ দিলাইছওইন।
মাই গো,
গত সাপ্তার বুইছালে ইতা বিল্ডিং অখলর বারোটা বাজাইলাইছে। বিল্ডিং অখর ফাটা ফুটা হুনছি আরোও ফাটাইছে। ইকারণে ইতা বিল্ডিং অখল এখন বেশ ঝুকিত আছে।
মাই গো,
আমরা গাউ গেরামর আদুম ছুদুম মানুষ। কুচ্ছু বুঝিয়ার না। এই সকল বিল্ডিং বাল্ডিং ঠিকঠাক করা দরকার না দরকার নায় ইতা আফনারাউ বুঝরা। আমরা তো মনে করিয়ার ইতা জলদি করি ঠিক করা দরকার।
মাই গো,
আমরার শেষ আকুতি যদি আফনার দয়ার নজর অয় তবে আমরা ইতা বিল্ডিং বাল্ডিং ভাঙ্গিয়া নতুন করি বানানির ব্যবস্থা করি দেউক্কা। আমরার লাখাইন গরীব মানুষ মরলে গো মাই আফনারে কে প্রধানমন্ত্রী কইয়া জান দিব। আশা করমু আফনে বিষয়টারে গুরুত্ব দিবা।
ইতি
আফনার ফুরনা ফাগল
জকিগঞ্জী চাচা