Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on সোমবার, ২৩ মার্চ, ২০১৫ | ১২:৩৩ PM

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর আাজার আাজার হতভাগা, আউয়া-জাউয়া অশিক্ষিত জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি আফনে আফনার হরুতা-মরুতারে লইয়া ভালাউ আছইন।
পর সমাচার মাই গো,
আমরার জকিগঞ্জ ইকান কিলা কিলা অইগেছে করি মনে অর। একজনে আরেক জনর লগে কোন মায়া-দরদ আছে করি মনে অয় না। এখন কারে মারিয়া কে বড় অইতা অউ অতা ছলের। এই কারণে গো মা, আমরার মাঝে অশান্তি শুরু অইছে।  
মাই গো,
খইলে খইবায় খইদিছি। আমরার জকিগঞ্জর এখনকুর অশান্তির পেছনে আফনারা দুই নেত্রী দায়ী। খালেদা আফায় হরতাল অবরোধ দিয়া মানুষরে করছওইন জিম্মি। আর আফনে তা প্রতিরোধ করতে পুলিশর উপর ভার দিছওইন। আর এই সুযোগে ফাইছওইন দলাল আর সুবিদাবাদী অখলে লাগাল। তারা পুলিশরে মিছা তথ্য দিয়া যা মনে ছায় তা খররা।
মাই গো,
বিএনপি-জামায়াতর যারা হরতাল-অবরোধে অশান্তি কররা তারা নিরাপদে থাকলেও ধরা খাইরা বেশীরভাগ নিরপরাদ মানুষ। গাউ গেরামর কিছু কিছু মোড়ল টাইফর মানুষে এখন সুযোগে সৎ ব্যবহার কররা। কুন্তা না খরলেও নিজর পরিবারর বিরোধে বিএনপি-জামায়াত খইয়া পুলিশরেদি ধরাইয়া দিরা।
মাই গো,
এ রকম ধরপাকড়র কারণে গাউ গেরামর মানুষ বেশ কষ্টে আছে। যারা সরাসরি আফনার দল করেনা তারা খুব কষ্টে আছে। মানুষে এখন খইতে পারেনা কুন সময় খারে ধরিয়া পুলিশে নিব। আর গো মাই, যারা তোড়া তুড়ি আওয়ামীলীগ ছাড়া অন্য দল করওইন তারার তো আর উফায় নাই।
মাই গো,
জকিগঞ্জে আওয়ামীলীগ আর জাতীয় পার্টি ছাড়া বাকি যে কয়টা দল আছে তারার নেতাকর্মী অখলর মনে খালি ‘পুলিশ-পুলিশ’। বিএনপি-জামায়তর সমর্থক অখল বাজার আটে খরচ করাত গেলে পুলিশ দেখলে লোকাইন। অনেকে রাইত নিজর বাড়িত না থাকিয়া অন্যর বাড়িত থাকওইন। অন্যবায়দি কিছু কিছু বিএনপি-জামায়াত সমর্থক অখলে রাস্তা-ঘাটও গাড়ি ভাঙ্গাভাঙ্গি কররা। কোন কোন সময় গাড়ি জ্বালাইরা। এতে সাধারন মানুষ বেশ বিফদও আছইন।
মাই গো,
এই অবস্থায় দেশটা কতদিন চলতো? আমরা গাউ গেরামর মানুষ অখলে মনে করি ইতা থাকি বাঁচার উফায় বার করা দরকার। আফনারা দুই নেত্রী সমঝোতাত আওয়ার দরকার। নাইলে গো মা, দেশর সাধারন মানুষর মাঝে শান্তি আইতো নায়। আমরা আশা রাখমু এ বিষয়ে আফনে চিন্তা করিয়া জরুরী ভিত্তিতে ব্যবস্থা নিবায়। 
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad