Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on সোমবার, ২৩ ফেব্রুয়ারী, ২০১৫ | ১০:৪৫ PM

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর আাজার আাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি আফনে খুব সুখে শান্তিতে আছওইন।
পর সমাচার মাই গো,
জকিগঞ্জর মানুষে কত বছর আগতাকি গ্যাস গ্যাস জফিলেও খেউ ই বেফারে মুখ লাড়ছওইন না। যাক তেব ইবার আমরার সেলিম উদ্দিন এমপি ছাবে জকিগঞ্জে গ্যাস দেওয়ার দাবী সংসদও জানাইছওইন।
মাই গো,
হুনলাম এমপি ছাবে বুলে চলতি মাসর এগারও তারিখ সংসদর সভাত রাষ্ট্রপতি ছাবর ভাষণরে ধন্যবাদ জানাইতে গিয়া জকিগঞ্জ গ্যাস দেওয়ার দাবী জানাইছওইন।
মাই গো,
জকিগঞ্জ মানুষর লাগি বিষয়টা অত্যান্ত খুশির খবর। এই উপজেলার মানুষে কতদিন তাকি যে গ্যাসর দাবী জানার তার কোন শেষ নাই। কিন্তু কেউ তারার কথাত কান দের না। যাক দেরীতে অইলেও শেষ পর্যন্ত আমরার এমপি ছাবে বিষয়টা তুলিয়া ধরছওইন। 
মাই গো,
আমরার এমপি ছাবে যেল কইছওইন “জকিগঞ্জে গ্যাসর দাবী এখন সারা উপজেলাবাসীর জানর দাবী”। বাস্তবেও গো মা, জকিগঞ্জর প্রত্যেকটা ঘরে ঘরে গ্যাস সরবরাহর লাগি এলাকার মানুষ এখন বেফানা।
মাই গো,
জকিগঞ্জর কান্দার উপজেলা বিয়ানীবাজারও বেশ কয়েক বছর আগে গ্যাস সরবরাহ করা অইছে। অথচ আমরার জকিগঞ্জর বেটিনতে লাকড়ি দিয়া রান্দিতে রান্দিতে জীবন দিলাইরা। এতে করি যেমন খরচ বেশী অর ঠিক একই ভাবে টাকাও বেশী খরচ অর।
মাই গো,
আমরার দাবী রইলো অবহেলায় থাকা জকিগঞ্জবাসীর অন্তত: এই দাবীটা আফনে পূরণ করি দেওয়ার ব্যবস্থা করবা। হাছা কথা কইলে গো মা, এই উপজেলার মানুষে সব থাকি বেশী সুযোগ সুবিদা পাওয়ার কথা। কারণ জকিগঞ্জ একটা মহকুমা শহর। দেশর সব কয়টা মহকুমা শহর জেলা অইলেও জকিগঞ্জ এখনও উপজেলা হিসেবে রইছে।
মাই গো,
আমার অনুরোধ থাকবো আফনে জরুরী ভিত্তিতে জকিগঞ্জর প্রত্যেকটা ঘরে ঘরে গ্যাস সরবরাহের ব্যবস্থা করবায়। যাতে করি এই উপজেলার মানুষ লাকড়ির বিড়ম্বনা ও টাকা পয়সা খরচ থাকি বাঁচে।
ইতি
আফনার ফুরনা ফাগল
জকিগঞ্জী চাচা

Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad