Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on শুক্রবার, ৩০ জানুয়ারী, ২০১৫ | ৮:১৪ PM

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর আাজার আাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি আফনে বেশ ভালা আছওইন।
পর সমাচার মাই গো,
আমরার গাউ গেরামর মানুষ অখল এখন বেশ কষ্টে আছওইন। কোন বায়দি সাহস করি বরইতে ফাররা না। প্রত্যেকদিন হুনা যায় এক দুইটা গাড়ি ভাঙ্গা বা জ্বালানী অর। কোন জরুরে বারইতে অইলে জান আল্লার আতও দিয়া বারইতে অয়।
মাই গো,
হেদিন গাড়িত উঠিয়া হুনি তিন বছরর এক ফুয়ায় তার বাপরে জিকার, “বাবা ই গাড়িত আগুন ধরবোনি”। উত্তরে বাপে কইরা “বাবা দোয়া করও কোন মনতে বাড়ি যাইগি”। বাপর কথা হুনিয়া ফুয়ায় কইলো “বাবা গাড়িত আগুন ধরলে আমারে লইয়া যাইবায়”।
মাই গো,
এখন শুধু সিলেট-জকিগঞ্জ রোডে নায় ফুরা দেশর চিত্র ঠিক এই রকম। এছাড়া গো মা, কিছু সংখ্যক দুস্কৃতিকারী অখলে গাড়ি ভাঙ্গে আর এর দায়ভার নিতে অয় পুরা এলাকার। মামলায় আসামী করা অয় অসহায় ও নিরপরাধ মানুষ অখলরে। একদল মামলাবাজ পুলিশরে উল্টা বুজাইয়া তার প্রতিপক্ষরে বিএনপি-জামায়াত কইয়া আসামী করে।
মাই গো,
হুনলে তাজ্জব অইবায়। এখন সিলেট-জকিগঞ্জ রোডের শাহবাগের পর থাকি বাংলা বাজার, সড়কের বাজারের পশ্চিমের ঈদগাহ, কঠালপুর, রামপুর ও নয়াগ্রামসহ বেশ কিছু জায়গার ফেসিঞ্জার গাড়িতে তুলেনা। এছাড়া এই সকল জায়গাত ড্রাইভার অখলে আতংকে ফেসিঞ্জার নামাইয়াও দেয়না। এতে চরম কষ্ট করতে অর ঐ সকল এলাকার মানুষর। 
মাই গো,
এই অবস্থায় আমরা আর কয়দিন থাকতাম। দয়া করি আফনারা দুই নেত্রীয়ে কোন একটা শান্তির পথ বার করউক্কা। নাইলে আমরার অবস্থা বেহাল অইযিব।
মাই গো,
আমরা আশা রাখমু আফনে যত তাড়াতড়ি ফারইন একটা সমঝোতার পথ বার করবা। দোয়া করি আল্লায় আফনারার প্রতি রহম নাজিল করউক্কা।
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad