মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। বাক্কা কয়েক দিন পর আফনার কাছে চিঠি লেখিয়ার। আশা করি আফনে ভালা আছওইন।
পর সমাচার মাই গো,
খেলা চিঠি আর বন্ধ চিঠি আফনার কাছে লেখিয়া কোন লাভ অর না। হয়তো গো মা, উড়াউড়ির কারণে আফনে চিঠি পড়ার সময় ফাইরা না। এরলাগি আমরার কোন দাবী দাওয়া পূরণ অর না।
মাই গো,
রাগ করিয়া গত ২/৩ সংখ্যায় আপনার উদ্দেশ্যে খোলা চিঠি লেখিয়ার না। কারণ লেখতে লেখতে আফনার মাধ্যমে কোন কাজ অর না। তবে খোলা চিঠি লেখা বন্ধ করায় আমরার পাঠক অখলর বড় অসুবিধা অর। অনেকে ফোন করি কইন আফনারা খোলা চিঠি বন্ধ করওইননা যানি। তাই পাঠক অখলরে কুশ রাখার লাগি আবার শুরু করলাম।
মাই গো,
দয়া করি একটি খেয়াল করউক্কা। আমরার জকিগঞ্জ হাসপাতালর এ্যাম্বুলেন্স প্রায় এক বছর থাকি নাই। গত সংসদ নির্বাচনর আগর রাইত খবিছ কিছু ফুয়া ফাংড়াইনতে গাড়িখান জ্বালাই লিছওইন। এতে আমরার বেশ অসুবিধা অর।
মাই গো,
আফনে দয়ার নজরখান দিয়া এই বিষয়টার সমাধান করউক্কা। যত তাড়াতাড়ি ফারইন একটা এ্যাম্বুলেন্সর ব্যবস্থা করি দেউক্কা। নাইলে আমরার লাখাইন গরিব অখলর অবস্থা খারাপ অইযিব।
মাই গো,
আমরা আশা করমু আফনে জকিগঞ্জ হাসপাতালর লাগি তড়িৎ একটা এম্বুলেন্সর ব্যবস্থা করি দিবা। আল্লায় আফনারে ভালা রাখউক্কা।
ইতি
আফনার ফুরনা ফাগল
জকিগঞ্জী চাচা
0 মন্তব্য:
Speak up your mind
Tell us what you're thinking... !