Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on রবিবার, ২০ জুলাই, ২০১৪ | ১১:০৪ PM

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি দেশবাসীরে লইয়া বেশ বালাউ আছও।
পর সমাচার মাই গো,
জকিগঞ্জর ইতিহাসে এই কয়েক বছরে বেশ কয়েকটা খুন অইলো। আগে ইতা তেমন হুনা যাইতো না। কিন্তু এখন গো মা, মাসে মাসে ১/২টা খুনর খবর পাওয়া যায়। যা দেখিয়া এখন জকিগঞ্জর মানুষ ঢরাইরা।
মাই গো,
জকিগঞ্জর খুন খারাবী এই ভাবে চলতে থাকলে আগামীতে আমরার কি উফায় অইবো তা চিন্তা করিয়া ফাইয়ার না। যদিও এই সকল খুনর পুরো দায়ভার পুলিশ প্রশাসনরে দেওয়া যার না। এর ফরেও গো মা কইতে অর এর একটা বিশাল দায়ভার পুলিশর উপরে বর্তায়।
মাই গো,
পুলিশর বিরুদ্ধে আমার এই কথা হুনিয়া আফনে কইতে ফারওইন কিলা? তাইলে গো মা হুনো, জকিগঞ্জে এই পর্যন্ত যে কয়টা খুন অইছে এর বেশীরভাগর মূল আসামী ধরতে পারে না পুলিশে। একটা খুন হওয়ার পরে পুলিশরে জিকাইলে খয়, অভিযান চলছে, আসামী খুঁজে পাওয়া যাচ্ছে না। আমারা তো আউয়া নায় গো মাই, আমরা খবর পাই পুলিশে কিলা আসামী অখলর লগে আতাত করিয়া টেকা খাইয়া আসামী ধরে না।
মাই গো,
খইলে কথা লাম্বা অইযিব। বেশী কুচ্ছু খইবার কাম নাই। আফনে তো আর পুলিশ সম্পর্কে জানরা। না জানলে গো মাই, সাদা মাঠা বোরকা পড়িয়া পাবলিক অইয়া কোন সমস্যা লইয়া একদিন থানাত গিয়া দেখউক্কা পুলিশে কিতা করে।
মাই গো,
পুলিশ সম্পর্কে আর কুচ্ছু খইতাম চাইয়ার না। এখন খইয়ার গো মাই, এই সকল খুনর মূল কারণ কিতা। আমি বেশ কিছু মানুষর লগে আলাপ করিয়া দেখছি, জকিগঞ্জর এই সকল খুনের নেপথ্যে সেটেলমেন্ট অফিস। বির্তর্কিত জায়গার বিষয়ে জকিগঞ্জর সেটেলমেন্ট কর্মকর্তা অখলে উভয় পক্ষ থাকি টেকা খাইয়া বুদ্ধি হিকাইয়া দিয়া মানুষরে হয়রানী করে। 
মাই গো,
আমি বেশ কয়েকটি বিষয়ে অনুসন্ধান করিয়া দেখছি, জকিগঞ্জর সেটেলমেন্ট কর্মকর্তা অখলে এক পক্ষর কাছ থাকিয়া টেকা খাইয়া খয় এই কাজ করি লাইলে তোমার নামে জায়গা দিলাইমু। আবার অপর পক্ষর টেকা খাইয়া খয় হি পক্ষে অতা করতো চার তুমি তা করতে দিলে জায়গা ফাইতায় নায়। যেভাবে হোক তুমি তারে আগ বাড়তে দিবায় না। ফলে মধ্যখানে সে কোন বির্তকত না জড়াইয়া নিজর মাঝে ঝগড়া লাগাইয়া দিলায়। আর এই সকল কারণে মানুষ জায়গা জমি লইয়া মারামারি করি মরের।
মাই গো,
হুনলে কান্দিবায়, যারা এই সকল ঝগরা ঝাটিত যায়না তারার জায়গা অন্যর নামে চলে যায়। ফলে অনেক বয়োবৃদ্ধ মানুষ হার্ট এ্যাটাক করিয়া মারা গেছওইন।
মাই গো,
আমরা আফনার মাধ্যমে এই সমস্যা থাকি বাঁচার রাস্তা খুঁজিয়ার। দয়া করি আমরারে উদ্ধার করও।
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad