Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on মঙ্গলবার, ১ জুলাই, ২০১৪ | ২:৩৮ PM

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি পবিত্র রমজান মাসও ইবাদত বন্দেগী করার প্রস্তুতি নিরায়।
পর সমাচার মাই গো,
পবিত্র রমজান মাসর আগমনে আমার লাখাইন গাউ গেরামর গরীব গোরা অখল বেশ খুশি। হখলর আশা পবিত্র রমজান মাসটা ইবাদত বন্দেগী করি কাটাইতা। আমার লাখাইন আউয়া-জাউয়া অনেকে পুরো বছরর গোনাহ মাফর লাগি রমজান মাসর অপেক্ষা কররা। জানিনা তারার এই অপেক্ষা কতটুকু কামও লাগবো।
তবে গো মা,
আমি একশভাগ আশাবাদী আমার গাউ গেরামর হত দরিদ্র আউয়া-জাউয়া মানুষ খাইয়া না খাইয়া টাউন বন্দরর মানুষ থাকি অনেক বেশী ইবাদত বন্দেগী করওইন। টাউন বন্দরর মানুষ প্রত্যেক দিন মাছ মাংস দিয়া সেহরী খাইয়া সারাদিন ঘুমাইয়া সন্ধায় কুরমা ফুলাউ দিয়া ইফতার করিয়া বুঝা যায় রোজা রাখতে কষ্ট অর। অথচ আমার গাউ গেরামর মানুষে লতা দিয়া ফতা খাইয়া সারাদিন কাম কাজর ফাঁকে দিয়া ক্বোরআন তেলাওয়াত, নফল নামাজ আর জিকির আজকার করিয়া সন্ধায় ছানা খিছুড়ি দিয়া ইফতার করিয়া বেশ শান্তি ফাইন। যা না দেখলে বুঝা কঠিন।
মাই গো,
আমি আফনার গেছে চিঠি লেখার উদ্দেশ্য অইলো যে, হুনছি আফনার সরকারর পক্ষ থাকি গরীব অখলর লাগি রমজান মাস সাহায্য পাঠানি অর। জানিনা এই সাহায্য কি পরিমাণ আইবো? রাস্তাত কি পরিমাণ রইবো? আর বাটার সময় কে কে ফাইবো?
মাই গো,
আফনারে কিতা খইতাম। আমরার গাউ গেরামর আউয়া-জাউয়া মানুষ অখলর লাগি আফনে সাহায্য ফাটাইন। আর রাস্তাত বড় বড় পেট আলাইনতে পেট ভরওইন। এরলাগি আমারার গরীব অখলর মাল যেলা ফাওয়া যায় অলা দিবায়।
মাই গো,
আমার লাখাইন গাউ গেরামর শত শত আউয়া-জাউয়া অখলর কোন উফায় নাই। সরকারর দেওয়া সাহায্য থাকি শুরু করি ধনী মানুষর দেওয়া সাহায্য যারা দেইন তারা ছাইয়া ছাইয়া নিজর গরীব অখলরে দেইন। আমার লাখাইন গরীব অখলর কুটুম খেশ বড় না থাকায় কুন্তা ফাওয়া যায় না। শুধু ইনও শেষ নায়, রমজানও বিভিন্ন পার্টিয়ে ইফতারর আয়োজন করলেও বড় বড় মানুষ অখর দাওয়াত থাকে। ইতাত আমার লাখাইন গরীব অখলর যাওয়ার সুযোগ নাই। কারণ আমরারে খাওয়াইলে তো তার দুনিয়ার মকসুদ হাছিল অইতো নায়। 
মাই গো,
লাম্বা লাম্বি অনেক কথা কইলাম। ইতায় মনর মাঝে দুঃখ আনবা না। তবে আমরার লাগি খেয়াল রাখবা। কারণ আল্লাহ ছাড়া দুনিয়াত আমরার কেউ নাই। দয়া করি সাহায্য সহযোগীতা করতে চাইলে যেভাবে আমরা ফাই এই ব্যবস্থাটা করবা।
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad