Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on শনিবার, ২১ জুন, ২০১৪ | ৬:৫২ PM

মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি নামী-দামী গাড়ি আর বিমান ছড়িরায়।
পরসমাচার মাই গো,
আমরার অবস্থা একবারে বেহাল। ইবারকুর মেঘ-বাদলির দিন গাউ গেরামও চলাচল করা কঠিন অইগেছে। গাড়ি ঘোড়া দূরর কথা এখন ফাউ লইয়া আটা আমরার লাগি কঠিন অইয়া পড়ছে। ফেখ ছেখর জন্ত্রনায় পাড়েদিয়া যাইতামগি জানে চায়।
মাই গো,
আমরার জকিগঞ্জর বেশীর ভাগ গাউ গেরামর রাস্তা এখন একেবারে কাঁচা। এরলাগি তুড়া এখজরা মেঘ দিলে রাস্তা ঘাটও ফেখ অইযায়। যার কারণে পুরা বর্ষা মৌসুম ফেখ ছানিয়া যাতায়াত করতে অয়। আর এই ফেখ ছানার কারণে অনেকর ফাউ ফচিয়া নানা জাতর বেমার অর।
মাই গো,
আমরা গরীবর ফুয়া ফুরিনতে আর কতদিন রাস্তা-ঘাট লইয়া কষ্ট করতাম। দয়া করি আফনে আমরার বায়দি একটু চাউক্কা। নাইলে আমরার কোন উফায় নাই। ফেখ ছানতে ছানতে জিন্দেগী বরবাদ করিয়া হারলাম।
মাই গো,
বছরও লাখ লাখ টেকা আফনার সরকারর পক্ষ থাকি উপজেলা পরিষদ ও ইউনিয়ন পরিষদর মাধ্যমে আইলেও আমরা ভাগর কুচ্ছু ফাইনা। আগর আমলর চেয়ারম্যান-মেম্বার আর অফিসার অখলে তুড়া টেকা মারিয়া খাইলেও বাকিগুইন দিয়া কাম করাইতা। কিন্তু এখনকুর চেয়ারম্যান-মেম্বার অখলে আগে তারা খাইয়া বাকি তাকলে কাম করাইন করি হুনি। এর মাঝেও যেন স্বার্থ আছে ওউ জাগাত তারা কাম করাইন। কেউ কেউ আত্মীয়-স্বজনর সুবিদার লাগি করাইন।
মাই গো,
স্থানীয় সরকারর এই করুন অবস্থার কারণে আমরা চিন্তিত। কারণ যে জাগাত চেয়ারম্যান-মেম্বার অখল এখন শুধু খানিত। তারা মানুষর উন্নয়নর লাগি কতটুকু করবো তা আফনেউ বুঝরা।
মাই গো,
আমি আফনার কাছে অনুরোধ করিয়ার। দয়া করি আমরার গাউ গেরামর হকির হকরা অখলর মাল যেলা চেয়ারম্যান, মেম্বার আর অফিসার অখলে খাইতে না ফারইন অউ ব্যবস্থা করিয়া দিবায়। যাতে সময়ে সময়ে আমরার ভাগ্যর পরিবর্তন অয়। দোয়া করি আল্লায় আফনার হায়াত দরাজ করউক্কা।
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad