জকিগঞ্জী চাচার খোলা চিঠি

মাননীয় প্রধানমন্ত্রী

হাসিনা মাই,

ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি দেশর খুন, গুম আর অপহরণ লইয়া বেশ চিন্তাত আছওইন।

পরসমাচার মাই গো,

একদিকে দেশর আইন শৃংখলার সীমা ছাড়া অবনতি আর অন্যদিকে ঝড় তোফানর যে লীলা শুরু অইছে এতে আমার লাখাইন গাউ গেরামর মানুষ অখল বেশ চিন্তাত পড়ি গেছওইন। তারা দেশর এই কঠিন অবস্থার মাঝে কিলা দিন কাটাইতা ইতা লইয়া বেশ চিন্তা কররা। এরপরেও গো মা, আল্লাহর গেছে শুকুর আদায় করিয়ার যে, এখনও আমরার জকিগঞ্জ গুম নামক জিনিষটা আইছে না। তবে গো মা, ঝড় তোফানে আমরারে এখবারে বেফানা বানাইলাইছে। 

মাই গো,

কারে খইতাম আমার লাখাইন গরীব অখলর ঘর দুয়ার ভাঙ্গিয়া তোফানে দিছে মেলাইয়া। এতে গো মা, আমরা কিতা খরতাম তা চিন্তা করিয়া ফাইয়ার না। নুন আনতে যে জায়গাত আমরার পানতা ফুড়ায় এই অবস্থায় আমি বা আমার লাখাইন গরীব অখলে ঘর দোয়ার কিলা ঠিক করতাম।

মাই গো,

এই গরীব অসহায় মানুষ অখলরে আফনে সাহায্য করা উচিত আছিল করি আমি মনে করি। এই পর্যন্ত ক্ষতিগ্রস্ত অখলরে আফনার সরকারর তরফ থাকি কোন ধরণর সাহায্য সহযোগীতা দেওয়া অইছে না। জানিনা আমার এই কথা খান বেয়াদবী অইলো কিনা? এরপরেও খইতে অর গো মা, কারণ আমার লাখাইন গরীবে ঘর ঠিক করাত লাগলে উফাস রইতে অইবো। এরলাগি আফনে আমরার সরকার হিসাবে কিছু সাহায্য সহযোগীতা করা দরকার। তবে সাহায্য করলে যেলা আমার লাখাইন আউয়া জাউয়া মানুষ অখলর হাত পৌছে এই ব্যবস্থাটা করবা। নাইলে খাউরা অখলে পথও খাইলিবা।

মাই গো,

এখন একটা গুরুত্বপূর্ণ কথা আফনারে না খইলে না অইবো। কারণ গো মা, এখন ঝড় তোফানর দিন। প্রায় সাপ্তাত এক/দুই দিন তুফান অইবো। এতে গাছ পালা ভাঙ্গিয়া রাস্তাত পড়বো। এতে চলাচলর অসুবিধা অইবো। এরলাগি এলজিইডি বা যে কোন সরকারী রাস্তার কান্দাত লাগাইল গাছ অখলর মালিক যেউ অউক না খেনে তানরে দয়া করি খইয়া দিবায় জলদি করি তা হরানির লাগি। নাইলে গো মা, মানুষর বেশ কষ্ট করতে অয়। কারণ এই গাছ পালা সাধারণ পাবলিক অখলে কাটিয়া হরানি বেআইনি। এরলাগি খেউ তা হরাইতে বা বেচতে চায় না। এতে দিনর পর দিন গাছ অখল রাস্তাত পড়ি থাকে। যার ফলে যানবাহন বা মানুষ চলাচল করতে কষ্ট অয়।

মাই গো,

আমি আশা রাখমু আফনে উল্লেখিত বিষয় দুইটার দিকে খেয়াল রাখবায়। কেননা গরীব অখলরে সাহায্য না দিলে তারা যেমন কষ্ট করবা ঠিক তেমনভাবে রাস্তাঘাট থাকি গাছ পালা না হরাইলে মানুষে তেমন কষ্ট করতে অইবো।

ইতি

আফনার ফুরনা ফাগল

জকিগঞ্জী চাচা