মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি আফনে ওউ বয়সও দেশর মানুষর উন্নয়নর লাগি চিন্তা কররায়।
পরসমাচার মাই গো,
আইজ আফনারে একটা বড় ধন্যবাদ দিতাম চাইয়ার। কারণ সব সময় আমি আফনারে গাউ গেরামর মানুষর দুঃখ-কষ্টর কথা হুনাই। ইবার অবশ্যই একটা খুশির সংবাদ হুনাইতাম চাইয়ার।
মাই গো,
গত কয়েকদিন আগে আমরার গাউত “একটি বাড়ি একটি খামার” প্রকল্পর কয়েকজন কর্মকর্তা আইয়া আফনার যে সুন্দর উদ্যোগর কথা আমারারে হুনাইলা। হুনিয়া গো মা, আমরা আফনার উফরে বেশ খুশি। কারণ এখন দেশও থাকিয়া আমার লাখাইন গরীবর কোন উপায় নাই। দেখা যায়, টেকা পয়সা জমানি তো দূরের কথা এক টেকা কামাইলে দশ টেকা খরচ অইযায়। সারাদিন রুজি রোজগার করিয়া যা ফাইলায় তা দিয়া বিয়ালে খরচ আনা যায় না।
মাই গো,
আফনে ‘একটি বাড়ি একটি খামার’র মাধ্যমে আমরার টেকা জমানির যে উদ্যোগ নিছওইন তা আমার লাখাইন গরীবর বড় উপকারে আইবো। হেদিন হুনলাম একটা ওয়ার্ডে ৬০ জন দিয়া কমিটি করা অইবো। এরি মাঝে কোন কোন জায়গাত বুলে কমিটি করা অই গেছে। এই কমিটির সদস্য অখলে বুলে দুই বছর পর্যন্ত মাসিক ২০০ টাকা রাখলে সরকার থাকি প্রতি মাসে আরোও ২০০টা দেওয়া অইবো। এছাড়া প্রতি বছর এই ৬০ জনর কমিটিত আরো দেড় লাখ টাকা সরকারর তরফ থাকি জমা অইবো। ইতা হুনিয়া গো মা, গাউ গেরামর মানুষ যে খুশ। তারা কইরা খালি মারিয়া যায় না যদি তবে আমরার হাসিনা সরকার যে ভালা। আরো কয়েক বছর এই সরকারর দরকার।
মাই গো,
আমরা গাউ গেরামর মানুষ জানিনা এই সমিতির ভবিষ্যৎ কিতা। এর ফরেও আউয়া-জাউয়া মানুষ হিসেবে আমার যা বুঝি তা অইলো, এই সমিতির দায়িত্বে সরকারর বিভিন্ন পর্যায়ে কর্মকর্তা অখল আছওইন। এরলাগি আশা করা যায়, তারা মারিয়া খাইতা নায়।
মাই গো,
উফরর এই কথা খান খওয়ার একমাত্র কারন অইলো আমরার দেখা, বেশ কিছু সমিতি বা এমএলএম কোম্পানী সময়ে সময়ে বিভিন্ন লাভ দেখাইয়া মানুষর টেকা লইয়া ভাগা। এরলাগি মানুষ এখন বেশ সতর্ক। ইতা সমিতিত হারাইতে আগে যারে এক ঘন্টা বুঝানি লাগতো এখন তারে একদিনেও বুঝানি জায়না। কারণ গো মা, মানুষে ডুশ খাইতে খাইতে বেশী হুশ অইগেছে।
যাক গো মা,
আমি আশা রাখমু, আফনে দয়া করি ‘একটি বাড়ি একটি খামার’র টেকা ইগুইন গরীব অখলরে যেলা কইরা অলা দিবা। দিলে আফনার প্রতি মানুষর মায়া-মমতা বাড়বো। মানুষে আগামীতে আফনারে লইয়া চিন্তা করবো। দোয়া করি আল্লায় যেন, আফনারে গরীব অখলর লগর ওয়াদা রক্ষা করার তৌফিক দেইন। আমীন।
ইতি
আফনার ফুরনা ফাগল
জকিগঞ্জী চাচা
0 মন্তব্য:
Speak up your mind
Tell us what you're thinking... !