Headlines News :
Home » » জকিগঞ্জী চাচার খোলা চিঠি

জকিগঞ্জী চাচার খোলা চিঠি

Written By zakigonj news on সোমবার, ১৪ এপ্রিল, ২০১৪ | ৩:০৭ AM


মাননীয় প্রধানমন্ত্রী
হাসিনা মাই,
ছিঠির ফয়লা গাউ-গেরামর হাজার হাজার হতভাগা, আউয়া-জাউয়া জনগণর ফক্ষ থাকি আমি বেহায়া বেইজ্জত, জনম দুঃখী, কপাল ফুড়া, আদুম ছুদুম, জকিগঞ্জী চাচার সালাম নিবায়। আশা করি দেশর আপামর জন সাধারণর উন্নয়নর লাগি আফনে বেশ চেষ্টা চালাইয়া যাইরা।
পর সমাচার মাই গো,
জকিগঞ্জ উপজেলার নয়া চেয়ারম্যান, ভাইস চেয়ারম্যান ও মহিলা ভাইস চেয়ারম্যানে চলতি মাসর ৩ তারিখ ক্ষমতা নিছওইন। আল্লায় জানে তারা আগামী ৫ বছরে জনগণর লাগি কিতা করবা। গত ৫ বছর জনগণ এই তিন জন চেয়ারম্যান সাবর কাজ-কাম দেখিয়া আশুদ্ধা অইগেছওইন। পুরা ৫ বছরর হিসাব মিলাইয়া দেখা যায়, এই তিন চেয়ারম্যানে গোটা বাগর এক ইউনিয়ন চেয়ারম্যানর কাম করাইছইন্না।
মাই গো,
শুধু ইকানো শেষ নায়, গত ৫ বছর দেখা গেছে উপজেলা পরিষদ চেয়ারম্যান আর ইউনিয়ন পরিষদর চেয়ারম্যান অখলর মাঝে খালি বিবেদ। কেউ কেউররে সয্য করতে পারইননা। একজন আরেক জনর লগে আলোচনা বা পরামর্শ করিয়া উন্নয়ন করা তো দূরর কথা তখন খালি আছিল কে কারে সাইজ করতা।
মাই গো,
জানিনা ইবার কিতা অইবো। দেখিয়ার তো ইকবাল ভাই, জাবেদ ভাই আর ইয়াহিয়া আপা আমার লাখাইন বুড়া নায়। তারা হখলউ ইয়াং মানুষ। আর জকিগঞ্জর প্রায় ইউনিয়নর চেয়ারম্যান অখলও ইয়াং। এরলাগি আশা করা যায় ইবার কিছুটা উন্নয়ন অইবো। বিবেদ কিছুটা কম অইবো।
মাই গো,
আমার মনে অয়, ইবার আফনে দয়া করি উপজেলা পরিষদরে কিছুটা সুযোগ সুবিদা দেউক্কা। কারণ মানুষে অত কষ্ট করি একজন উপজেলা চেয়ারম্যান, ভাইস চেয়ারম্যান ও মহিলা ভাইস চেয়ারম্যান বানানির বাদে তারার কাছ তাকি যদি দেখার মতো কোন উন্নয়ন ফাইননা তাইলে মনরে বুঝ দিতা কিলা? আমরা মনে করিয়ার জকিগঞ্জর উপজেলা চেয়ারম্যান অখলরে গত ৫ বছর থাকি ইবার একটু বেশী সুযোগ সুবিধা দেওয়া উচিত। কারণ গো মা, ইবার জকিগঞ্জ কানাইঘাটর কোন স্থানীয় এমপি নাই। আফনার বদৌলতে আমরা ইবার বিয়ানীবাজারর এক ভাইরে এমপি হিসাবে ফাইছি।
মাই গো,
আফনার কাছে আমার অনুরোধ। দয়া করিয়া ইবার একটু জকিগঞ্জর মানুষর প্রতি দয়াবান অউক্কা। নাইলে গো মা, আমার গজব অইজিব। খাড়ারি ছাড়া আমরার নাউ আউরি ঘুরবো।
মাই গো,
গাউ গেরামর জনগণর ফক্ষ থাকি আমার দাবীটা আফনার কাছে দিলাম, আফনে দয়া করি এইবার উপজেলা পরিষদর ক্ষমতাবৃদ্ধি করউক্কা। নাইলে আমরার কোন উফায় থাকতো নায়। আমি আশা রাখমু, আফনে বিষয়টা গুরুত্বসহকারে বিবেচনা করবায়।
ইতি
আফনার ফুরনা ফাগল
জকিগঞ্জী চাচা
Share this article :

0 মন্তব্য:

Speak up your mind

Tell us what you're thinking... !

ফেসবুক ফ্যান পেজ

 
Founder and Editor : Rahmat Ali Helali | Email | Mobile: 01715745222
25, Point View Shopping Complex (1st Floor, Amborkhana, Sylhet Website
Copyright © 2013. জকিগঞ্জ সংবাদ - All Rights Reserved
Template Design by Green Host BD Published by Zakigonj Sangbad